Addysg

Gyda chefnogaeth Cronfa Datblygiad Cynaladwy Ardal o Harddwch Naturiol Eithriadol Ynys Môn, mae YNGC wedi bod yn gweithredu prosiect yn dwyn yr enw Morwenoliaid, Llanwau a Phobl, ac mae rhan o hwnnw’n cynnwys rhaglen addysgol yng ngwarchodfa natur Cemlyn.

Dechreuwyd ar y prosiect fis Tachwedd 2003, pan benodwyd Swyddog Pobl a Bywyd Gwyllt cyntaf yr Ymddiriedolaeth, Ageliki Politis, er mwyn gweithredu (ymhlith pethau eraill) nifer o deithiau maes gan ysgolion i Gemlyn. Yr amcan oedd creu mwy o ymwybyddiaeth ymhlith plant lleol o bwysigrwydd bioamrywiaeth a chadwraeth drwy eu galluogi i archwilio'r cynefin unigryw hwn. Penodwyd Ben Stammers i'r swydd fis Mai 2004 ac yn ystod yr haf, bu mwy na 200 o blant o 10 ysgol gynradd leol yn ymweld i'r safle ac yn cymryd rhan mewn gweithgareddau amrywiol.

Roedd y prosiect yn ceisio cysylltu â phynciau'r Cwricwlwm Cenedlaethol, fel Gwyddoniaeth, Daearyddiaeth, Hanes, Saesneg ac AG, a darparu sylfaen ar gyfer gwaith parhaus yn yr ystafell ddosbarth. Sicrhawyd cyswllt yn aml rhwng y pynciau amrywiol hyn â themâu cyffredinol yr amgylchedd, mewn ymdrech gydwybodol i annog disgyblion i feddwl am eu perthynas â'u hamgylchedd.

Roedd y gweithgareddau'n cynnwys arolygu cynefinoedd, gyda'r disgyblion yn cofnodi gwahanol rywogaethau, yn ymchwilio i fywyd gwyllt y lagŵn a'r glannau gan ddefnyddio rhwydi, yn gwylio'r morwenoliaid ac yn cymryd rhan mewn ymarferion a oedd yn canolbwyntio ar sylwi ar eu hamgylchedd gan ddefnyddio eu synhwyrau. Mewn rhai achosion, aeth y Swyddog Pobl a Bywyd Gwyllt a'r athrawon maes i ysgolion i sgwrsio a dangos sleidiau i blant ac i annog ymarferion ysgrifenedig a rhyngweithiol yn yr ystafell ddosbarth.

Am fanylion pellach am y gweithgareddau hyn, gweler y Grid Awgrymiadau ar gyfer gweithgareddau i ysgolion.
(word file 44k) (pdf file 64k)