|
Adar eraill
Mae Pioden y Môr a’r Cwtiad
Torgoch ill dau yn magu yn y warchodfa, gan wneud eu nyth
yng nghanol cerrig mân yr esgair. Gan fod eu dewis o
safle i nythu mor agored, mae’r ddau rywogaeth yn dibynnu
ar guddio eu hwyau a’r cywion. Fel ymateb i fygythiad
uniongyrchol, bydd oedolyn y Cwtiad Torgoch yn cymryd arno
bod ganddo adain wedi torri, gan ddenu sylw ysglyfaethwr posibl
drwy ffugio anaf a’i arwain oddi wrth y nyth. Er mwyn
gwarchod y rhydwyr hyn, a’r morwenoliaid, gofynnir i
ymwelwyr beidio â cherdded ar ochr y lagŵn i’r
esgair yn ystod misoedd yr haf.
Mae lleoliad Cemlyn a’i amrywiaeth o gynefinoedd
yn ei wneud yn hafan i amrywiaeth o adar drwy gydol y flwyddyn.
Fel arfer, gwelir y Cwtiar, yr Wyach Fach a Hwyaden yr Eithin
o amgylch y lagŵn, ac mae Clochdar y Cerrig i’w weld
yn rheolaidd yn y prysgwydd o amgylch. Mae amrywiaeth o rydwyr,
fel y Gylfinir, Pibydd y Mawn, y Cwtiad Aur a’r Pibydd Coesgoch
yn defnyddio’r ardal hefyd a gellir gweld y Pibydd Du ar y
traeth creigiog.
Ymhlith yr ymwelwyr i gadw llygad amdanynt
yn ystod yr haf mae’r Llwydfron a Thelor yr Hesg, tra bo’r
Chwiwell, y Gorhwyaden, yr Hwyaden Frongoch ac adar gwyllt
eraill i’w gweld yma yn ystod yr hydref a’r gaeaf.
Daw adar mudo eraill yma o dro i dro a
thros y blynyddoedd, gwelwyd amrywiaeth o adar prin iawn yma
– bydd pob adarwr brwd eisiau archwilio’r safle
i geisio canfod rhywbeth anarferol.
|
